उदयपुर १८ असार -त्रियुगा नगरपालिकाले कृषकहरूलाई आधुनिक प्रविधिमा आधारित व्यवसायिक पशुपालनमा प्रोत्साहित गर्ने उद्देश्यले एक महत्वपूर्ण कदम चालेको छ। बुधबार एक विशेष समारोहबीच नगरपालिकाले १० जना स्थानीय किसानहरूलाई विद्युतीय च्यापकटर मेसिन वितरण गरेको हो।
नगरपालिकाका अनुसार,च्यापकटर मेसिनको कुल लागतको ७५ प्रतिशत खर्च नगरपालिकाले अनुदान स्वरूप व्यहोरेको हो। यस प्रविधिले कृषकहरूलाई घाँस काट्ने काममा सहजता प्रदान गर्नुका साथै समय र श्रमको उल्लेखनीय बचत गर्ने विश्वास गरिएको छ। साथै,राम्ररी च्यापिएको घाँसले पशुपालनमा पोषणको गुणस्तर पनि बढाउने अपेक्षा गरिएको छ।
कार्यक्रममा बोल्दै नगरप्रमुख बसन्त कुमार बस्नेतले भने,“हामी कृषकहरूलाई आत्मनिर्भर र प्रविधिमैत्री बनाउन चाहन्छौं। यस्ता उपकरणहरूले उनीहरूलाई पशुपालनमा थप सहजता, समयबचत र उत्पादनमुखीता प्रदान गर्नेछन्।”
सो समारोहमा उपप्रमुख महेश्वरी राई, पशु शाखा प्रमुख इन्द्रनारायण चौधरी,शाखाका कर्मचारीहरू,र स्थानीय कृषकहरूको उल्लेखनीय उपस्थिति रहेको थियो।नगरपालिकाले देखाएको यो पहलले नगरभित्रको कृषि क्षेत्रलाई प्रविधिमा आधारित बनाउँदै समग्र विकासमा टेवा पुर्याउने विश्वास गरिएको छ।
