उदयपुर भदौ २४- जेनजी प्रदर्शनकारी समूहले मंगलबार त्रियुगा नगरपालिका पूर्व मेयर बलदेव चौधरीको पुरानो गाईघाट स्थित निवासमा तोडफोड गरेको छ । दिउँसोदेखि उग्र बनेको आन्दोलनको क्रममा प्रदर्शनकारीहरूले घरमा प्रवेश गरी ढुंगा-मुढा प्रहार गर्दै झ्याल, ढोका र अन्य भौतिक संरचनामा क्षति पुर्याएका हुन् ।
घरमा तोडफोड हुँदा पूर्व मेयर चौधरीको परिवार भने सुरक्षित रहेको प्रहरीले जनाएको छ । तर, घटनापछि स्थानीय क्षेत्रमा ठूलो संख्यामा सुरक्षाकर्मी परिचालन गर्नुपरेको जिल्ला प्रहरी कार्यालय उदयपुरले जानकारी दिएको छ ।
दिनभरिको चर्को आन्दोलनको क्रममा जेनजी आन्दोलनकारीहरूले त्रियुगा नगरपालिकाभित्रका विभिन्न सरकारी कार्यालय, दलका कार्यालय र अन्य संरचनामा तोडफोड तथा आगजनी गरेका थिए । मंगलबार भएको यो घटनाले नगरलाई अझै तनावग्रस्त बनाएको छ ।
लगातारको तोडफोड र प्रदर्शनका कारण गाईघाट बजारलगायत त्रियुगा नगरपालिकाभित्रका अधिकांश व्यापारिक गतिविधि प्रभावित बनेका छन् । व्यापारीहरूले आफ्ना पसल बन्द गरेका छन् भने सर्वसाधारण त्रसित अवस्थामा घरभित्रै बस्न बाध्य भएका छन् ।
