उदयपुर, असार १५ – त्रियुगा नगरपालिकाले २२ औं राष्ट्रिय धान दिवस ‘धान उत्पादनमा वृद्धि, आत्मनिर्भरता र समृद्धि’ भन्ने नाराका साथ भव्य रूपमा मनाएको छ। नगरपालिकाको वडा नं। ४ स्थित बगाहामा विशेष कार्यक्रमको आयोजना गरी उक्त दिवस मनाइएको हो।
कार्यक्रमको उद्घाटन त्रियुगा नगरपालिकाका नगरप्रमुख बसन्त कुमार बस्नेत र उपप्रमुख महेश्वरी राईले संयुक्त रूपमा धान रोपेर गर्नुभयो। प्रमुख तथा उपप्रमुखद्वयले किसानहरूसँगै खेतमा उत्रिएर धान रोपेर किसानको श्रम र योगदानप्रति सम्मान प्रकट गर्नुभयो।
उक्त अवसरमा नगरप्रमुख बस्नेतले कृषि उत्पादनमा आत्मनिर्भर बन्नु आजको आवश्यकता भएको बताउँदै धान दिवसले कृषकहरूको मनोबल उच्च बनाउने विश्वास व्यक्त गर्नुभयो। उपप्रमुख राईले पनि स्थानीय तहले कृषि प्रवर्द्धनमा विशेष प्राथमिकता दिएको जानकारी दिनुभयो।
कार्यक्रममा स्थानीय किसान, जनप्रतिनिधि, कर्मचारी तथा सर्वसाधारणको उल्लेख्य सहभागिता रहेको थियो। उपस्थितहरूले धान रोपाईसँगै परम्परागत लोकगीत गाउदै धान रोपेर असार १५ लाई उल्लासपूर्ण रूपमा मनाएका थिए।
