उदयपुर, असार ९ – नगरपालिकाले आगामी आर्थिक वर्ष २०८२ र ०८३ का लागि कुल १ अर्ब १३ करोड ३५ लाख ४१ हजार ६२ रुपैयाँको बजेट सार्वजनिक गरेको छ। नगर सभामा उपप्रमुख मणिकादेवी दुलालले आगामी बर्षको लागि सो बजेट सार्वजनिक गर्नु भएको हो ।
सभामा उपप्रमुख मणिकादेवी दुलालले प्रस्तुती गर्दै स्थानीय आवश्यकता, पूर्वाधार निर्माण, सामाजिक विकास तथा समावेशी कार्यक्रमहरूलाई प्राथमिकता दिइएको जानकारी दिए। उनले बजेटको प्रभावकारी कार्यान्वयनका लागि सबै सरोकारवाला निकाय, नागरिक र साझेदारहरूको सहकार्य अपरिहार्य रहेको उल्लेख गरे।
नगरपालिकाले चालु तथा प्रशासनिक खर्च तर्फ ७४ करोड १० लाख र कार्यक्रम तथा पुजीगत खर्चतर्फ ३९ करोड २५ लाख ४१ हजार ६२ रुपैयाको बजेट ल्याएको हो ।
नगरपालिकाले संघिय सरकार तथा प्रदेश सरकारबाट प्राप्त राजश्व बाँडफाँडबाट १६ करोड ६९ लाख ९६ हजार, संघिय सरकार तथा प्रदेश सरकारबाट प्रापत वित्तिय समानीकरणबाट १५ करोड ३४ लाख, संघिय सरकार तथा प्रदेश सरकारबाट प्राप्त शसर्त अनुदानबाट ५३ करोड ६ लाख ६४ हजार, आन्तरिक स्रोतबाट ४ रकोड ४० लाख, विभिन्न विकास साझेदार संस्थाबाट १ करोड ७६ लाख ३६ हजार, गत सालको मौज्दातबाट १ करोड ५० लाख ७२ हजार ४ सय ६२ रुपैया र संघिय सरकार तथा प्रदेश सरकारबाट प्राप्त शसर्त समपुरकबाट १ करोड ८० लाख स्रोतबाट आगामी आर्थिक बर्षको बजेट व्यवस्थापन गरिएको निति तथा कार्यक्रममा उल्लेख गरिएको छ । नगरपालिकाले विभिन्न बिषयगत क्षेत्रमा समेत प्रत्यक्ष विकासको अनुभुती हुने किसिमबाट बजेट ल्याएको नगरपालिकाले जनाएको छ ।
बजेटमार्फत नगरपालिकाले शिक्षा, स्वास्थ्य, खानेपानी, कृषि, सडक, वातावरण तथा सामाजिक समावेशी कार्यक्रमहरूलाई प्राथमिकता दिने योजना बनाएको छ।नगरप्रमुखले नागरिकको विश्वास र विकासप्रतिको अपेक्षालाई सम्बोधन गर्न पारदर्शी र उत्तरदायी प्रशासनको खाँचो औँल्याउँदै कार्यान्वयनमा व्यापक सहभागिता सुनिश्चित गरिने बताएका छन्।
