लामखुट्टेको टोकाइबाट हुने डेङ्गुबाट बच्न उदयपुरको त्रियुगा नगरपालिकाले ‘लार्भा खोज र नष्ट गर’ अभियान सुरु गरेको छ ।
पालिकामा डेंगुसंक्रमणका बिरामी बढ्न थाले पछि पालिकाका विभिन्न क्षेत्रमा लामखुट्टेले अण्डा पार्नसक्ने सम्भावित स्थानको खोजी गरी लामखुट्टेको लार्भा नष्ट गर्न घरदैलो अभियान सुरु गरिएको हो । नगरपालिकाका नगर प्रमुख बसन्त बस्नेतले १६ वटै वडा कार्यालय, स्वास्थ्य संस्था, सामुदायिक तथा संस्थागत विद्यालय, टोल विकास संस्थालाई जानकारी गराउदै डेंगुको व्यवस्थापन र नियन्त्रण अभियान सञ्चालनका लागि निर्देशन दिनु भएको हो ।
बिहान र साँझपख डेंगुसंक्रमण सार्ने खाले लामखुट्टे बढी सक्रिय हुने र टोक्ने हुँदा सकेसम्म घरबाहिर खेतबारी, हाँस, सुङ्गुर, बङ्गुर फार्ममा ननिस्कन आग्रह गर्दै अभियानमा सहभागीहरुले गाईघाट बजारमा रहेको मोटर ग्यारेज, मोटरसाइकल ग्यारेज लगायतका मच्छर बढी पाइने खाल्डा खुलडीहरुमा गएर सर सफाई गर्नुका साथै मच्छर मार्ने काम गरेको थिए ।
अभियानमा नगर उप प्रमुख महेश्वरी राई, प्रमुख जिल्ला अधिकारी , जिल्ला स्वास्थ्य कार्यालय, जिल्ला अस्पताल, नेपाली सेना, सशस्त्र प्रहरी, नेपाल प्रहरी लगायत सरोकार वाला संघ संस्था बिद्यार्थी सर्व साधारण सहभागी भएका थिए ।
