त्रियुगा नगरपालिकाको नगर प्रमुख बसन्त कुमार बस्नेतले बिहीवार त्रिनपा १६ रातापानी र त्रिनपा १५ बरुवा डहर जोड्ने झोलुङ्गे पुलको उद्घाटन गरेका छन् ।
रातापानीगाउँबाट डहर जोड्ने बरुवा खोलामा कुल ८२ मी लम्बाइ भएको झोलुङ्गे पुल निर्माणसँगै वर्षौँदेखि भोग्दै आएको दुःख हटेको भन्दै स्थानीयहरु खुसी भएका हुन्। पूर्वाधार निर्देशानलय इटहरीको समन्वयमा संघिय सरकार र त्रियुगा नगरपालिकाको करिव ४२ लाख बजेटले उपभोक्ता समिती मार्फत उक्त स्थानमा पुल निर्माण गरिएको हो ।
पुल उद्घाटन गर्दै नगर प्रमुख वसन्त बस्नेतले पुल निर्माण कार्यमा सहयोग गर्नेलाई धन्यवाद ज्ञापन गर्नुका साथै सबै एकजुट भएमा विकास तीव्र र दिगो हुने बताउनु भयो । उहाँले आफ्नो ध्यान शहरमा मात्र बिकास नभएर नगरका अप्ठ्यारा र विकट ठाउँ हरुमा पनि आवश्यकता अनुसार बिकास गर्नु पर्ने रहेको उल्लेख गर्नु भयो ।
वडा नं १४, १५ र १६ लाई पर्यटन प्रवर्द्धनका लागि त्यहीँ किसिमको बिकास गर्न सके गाईघाट बजारको मुख्य आयस्रोत बन्ने भन्दै यी वडा हरुमा हिल स्टेसन र पर्यटन सम्बन्धि अन्य योजनाहरु ल्याएर काम गरि रहेको मेयर बस्नेतले बताउनु भयो । कार्यक्रममा वडा नं १५ का अध्यक्ष गणेश तिम्सिना, वडा नं १६ का वडा अध्यक्ष मान बहादुर राई सहित निर्माण उपभोक्ता समितिका अध्यक्ष सहित गाउका शिक्षक तथा अग्रजहरुको उपस्थिति थियो ।
