साउन १३ -उदयपुर र खोटाङ जिल्लालाई जोड्ने सगरमाथा राजमार्गअन्तर्गत दिक्तेल–गाईघाट सडकखण्डको सुनकोशीस्थित फोक्सिङटार क्षेत्रमा स्थानीय बासिन्दाहरूका लागि सामान ढुवानी गर्न सहज होस् भन्ने उद्देश्यले घिर्नी (केबुल ट्रली) जडान गरिएको छ।
सुनकोशी नदी पार गर्दै दैनिक उपभोग्य सामग्रीदेखि निर्माण सामग्रीसम्म ओसारपसार गर्नुपर्दा स्थानीयहरू निकै सास्ती बेहोर्दै आएका थिए। पुल नहुँदा जोखिमपूर्ण डुंगा यात्रा र लामो परिक्रमाबाट सामग्री ल्याउनु बाध्यता थियो। अब भने घिर्नी प्रणालीको माध्यमबाट सहज, सुरक्षित र छिटो सामान ओसार्न सकिने भएको छ।
फोक्सिङटारको अस्थायी बेलीब्रिज झिकेपछि गाईघाट-दिक्तेल सडकमा सिधा यातायात अहिले पूर्ण रुपमा बन्द भएको छ । सुनकोशीमा हिउँदमा मात्र अस्थायी बेलीब्रिज जडान हुने भएकाले अन्य समयमा आवश्यक सामान ढुवानी गर्न कुनै विकल्प नभएपछि घिर्नी जडान गरिएको हो । फोक्सिङटार क्षेत्रमा पुल निर्माणको प्रक्रिया अघि नबढेसम्म यो घिर्नीले वैकल्पिक सहारा दिने स्थानीयवासीहरू बताउँछन्।
