उदयपुर साउन ५ – त्रियुगा नगरपालिकाले पर्यटकीय क्षेत्रको विविधीकरण गर्दै हावाबाटको साहसिक खेल प्याराग्लाइडिङलाई नयाँ सम्भावना र आकर्षणको केन्द्रको रूपमा विकास गर्ने योजना अघि बढाएको छ।
नगरप्रमुख बसन्त कुमार बस्नेत को नेतृत्वमा हालै त्रियुगा नगर क्षेत्रभित्रको राते डाँडा क्षेत्रमा प्याराग्लाइडिङका सम्भावनाबारे प्रारम्भिक अध्ययन र अवलोकन भ्रमण गरिएको हो।भूगोल र दृश्यावलोकनको दृष्टिले अत्यन्त आकर्षक र उपयुक्त देखिएको राते डाँडामा साहसिक हवाई खेलको प्रचुर सम्भावना रहेको निष्कर्ष निकालिएको छ।
त्रियुगा नगरमा प्याराग्लाइडिङको इतिहास भने नयाँ होइन। २०७९ सालमा नै Flying Wonders Paragliding School टोलीले राते डाँडाबाट पहिलो परीक्षण उडान गरिसकेको थियो।जसले नगरको आकाशमा पहिलोपटक प्याराग्लाइडिङको पखेटा फैलाएको ऐतिहासिक दिन बनाएको थियो।त्यही परीक्षणलाई आधार बनाएर अहिले नगरपालिका थप प्राविधिक मूल्याङ्कन, पूर्वाधारको विकास, तथा निजी क्षेत्रको सहकार्यमा सुरक्षित र व्यवस्थित रूपमा नियमित उडानका लागि तयारी गरिरहेको छ।
त्रियुगा नगरपालिकाले यसअघि जल पर्यटन र्याफ्टिङ र कायकिङ० को विकासमा सफलता पाइसकेको छ। अब साहसिक हवाई खेललाई अघि बढाउँदै नगरलाई समग्र साहसिक पर्यटन केन्द्रको रूपमा उभ्याउने लक्ष्य लिएको छ। यसबाट आन्तरिक र बाह्य पर्यटक आकर्षण बढ्नुका साथै स्थानीय स्तरमा रोजगारी, आयआर्जन र पूर्वाधार विकासमा समेत टेवा पुग्ने विश्वास गरिएको छ।
नगरप्रमुख बस्नेत संग कुरा कानी गर्दा जसरी पनि यो योजनालाई साकार पार्छौं। यो केवल पर्यटकीय सम्भावना होइन, त्रियुगा नगरको भविष्यको पहिचान हो। उनले भने
यस योजनाले त्रियुगा नगरलाई केवल धार्मिक र जल पर्यटनमै सीमित नराखी, साहसिक खेल पर्यटनको नयाँ गन्तव्यको रूपमा स्थापित गर्ने आशा गरिएको छ।राते डाँडाबाट सुरु भएको यो पहल केवल एक पर्यटकीय कार्यक्रम होइन, त्रियुगा नगरको नयाँ पहिचान निर्माणको आधार बन्ने संकेत देखिएको छ।
