उदयपुर साउन ५ – साउन महिनाको पहिलो सोमबारको अवसरमा त्रियुगा नगरपालिका–११, ढिम्की स्थित इन्द्रेश्वर महादेव मन्दिरमा श्रद्धालु भक्तजनको घुइँचो लागेको छ। बिहान ५ बजेदेखि नै दर्शनार्थीहरूको लहर सुरु भएको थियो।
साउन महिनाका सोमबारहरू भगवान् शिवको विशेष दिन मानिन्छ। यसै कारण आज उदयपुरका शिवालयहरूमा पूजाआजा, अभिषेक र दर्शनका लागि श्रद्धालुहरूको उल्लेखनीय भीड लागेको हो। त्रियुगा बसपार्कस्थित शान्तिधाममा समेत भक्तजनहरूको उल्लेखनीय उपस्थिति देखिएको छ। शिवभक्तहरूले जल, दूध, दही, बेलपत्र, धतुरो, लगायत सामग्री अर्पण गर्दै “ओम् नमः शिवाय” जप गरेका थिए।
यस्तै, झीगु नेवाः पुचः गाईघाट ले विगत वर्षहरू झैँ यसपटक पनि भक्तजनहरूका लागि निःशुल्क पिउने पानीको व्यवस्था गरेको छ। संस्थाका सचिब गोपाल श्रेष्ठ का अनुसार, घाम र गर्मीले भक्तजनलाई असहज नहोस् भनेर हामीले पानी वितरण गरिरहेको बताए । धार्मिक गतिविधि व्यवस्थित बनाउन स्थानीय प्रशासन, नगर प्रहरी र स्वयंसेवकहरूको विशेष सक्रियता देखिएको थियो।
इन्द्रेश्वर महादेव मन्दिरमा पूजाआजा गर्दै भक्तजन
