उदयपुर २५ असार- जिल्ला उद्योग वाणिज्य संघ उदयपुरको आयोजनामा र गुणस्तर तथा नापतौल कार्यालय विराटनगरको समन्वयमा त्रियुगा नगरपालिका बसपार्क नजिक संघको कार्यालय परिसरमा सञ्चालित तीनदिने नापतौल शिविर हाल जारी छ।
नापतौल शिविर मिति २०८२ असार २४, २५ र २६ गते सञ्चालन गरिएको उक्त शिविरमा उद्योगी, व्यापारी तथा व्यवसायीहरूले आ–आफ्नो नाप्ने, तौलने यन्त्र, उपकरण, ढक तराजुहरूको परीक्षण, नयाँ दर्ता तथा नविकरण गराएका छन्।
शिविर गुणस्तर तथा नापतौल कार्यालय विराटनगरकी निरीक्षक मनिषा राईको नेतृत्वमा सञ्चालन गरिएको थियो।जिल्ला उद्योग वाणिज्य संघ उदयपुरका अध्यक्ष गजेन्द्र कुमार भगतले उद्योगी व्यवसायीहरूका लागि सहज र कानुनी रूपले व्यवसाय सञ्चालन गर्न सहयोग पुगोस् भन्ने उद्देश्यले शिविर आयोजना गरिएको बताए। संघका महासचिव सुनिल साहका अनुसार शिविरमा ५० जना भन्दा बढीले आफ्नो ढक तराजु तथा नाप तौलका सामग्री नविकरण तथा चेक जाँच गरेको र बाँकी दिनमा अझै थप व्यवसायीहरूको सहभागिता रहने जानकारी दिए ।
संघले यस्तो कार्यक्रमले व्यवसायीहरूलाई कानुनी दायरामा रही गुणस्तरीय सेवा प्रवाह गर्न प्रेरित गर्ने विश्वास लिएको छ। शिविरमा सहभागिताका लागि संघले सबै उद्योगी तथा व्यवसायीहरूलाई आ–आफ्ना उपकरणसहित बिहिवार २६ गते सम्म उपस्थित भई नाप्ने, तौलने यन्त्र, उपकरण सहित आउन आग्रह गरेकाछन।
