उदयपुर १७ असार – माछापालन प्रवर्द्धन गर्ने उद्देश्यले त्रियुगा नगरपालिका वडा नं। १ तथा २ को समन्वयमा राष्ट्रिय मत्स्य अनुसन्धान केन्द्र गोदावरी, ललितपुरबाट ल्याइएको माछाको भुरा पुराना जोगीदह स्थित पोखरीहरूमा निःशुल्क रूपमा वितरण गरिएको छ।
वडा नं। १ का अध्यक्ष मनोज चौधरी तथा समाजसेवी भुपधोज बस्नेतको अगुवाइमा सम्पन्न कार्यक्रममा अनुसन्धान केन्द्रका प्रमुख श्री किशोर लामिछानेको विशेष उपस्थितिमा माछाको भुरा हस्तान्तरण गरेको हो ।
केन्द्रबाट प्राप्त प्राविधिक प्रतिवेदन र ल्याब परीक्षणपछि दुईवटा पोखरीमा २६,२०० पिस माछाको भुरा सञ्चय गरिएको हो। यो कार्य त्रियुगा नगरपालिकाको कृषि तथा मत्स्य विकास योजनासँग अभिसारित रूपमा अगाडि बढाइएको बताइएको छ।
अध्यक्ष मनोज चौधरीले यस पहलले स्थानीय युवालाई रोजगारीको अवसर सिर्जना गर्ने, उत्पादनमूलक कार्यमा लगानी बढाउने र दीर्घकालीन रूपमा माछापालनलाई व्यवसायिक बनाउन मद्दत पुग्ने विश्वास व्यक्त गरे।
स्थानिय तह, अनुसन्धान केन्द्र र समुदायको सहकार्यमा सम्पन्न यो कार्यले अन्य वडाहरूमा समेत मत्स्य व्यवसायको सम्भावनालाई टेवा पुर्याउने अपेक्षा गरिएको छ।
