बेलका, उदयपुर १४ असार – बेलका नगरपालिकाको इतिहासमै पहिलोपटक आयोजित विज्ञान प्रदर्शनी कार्यक्रम शुक्रबार सफलतापूर्वक सम्पन्न भएको छ। नगरपालिका स्तरीय यस विज्ञान प्रदर्शनी कार्यक्रमले विद्यार्थीहरूमा वैज्ञानिक सोचको विकास र अनुसन्धानतर्फको अभिरुचिलाई उजागर गर्दै उल्लेखनीय सफलता हासिल गरेको छ।
नगरपालिकाको शिक्षा, युवा तथा खेलकुद विकास शाखाद्वारा आयोजित उक्त कार्यक्रम जनता नमुना माध्यमिक विद्यालय गुरुङ्गचौरीको प्रांगणमा सम्पन्न भएको थियो। प्रदर्शनीमा नेपाल एष्ट्रोनोमिकल सोसाइटी र जनता नमुना माविले प्राविधिक सहयोग प्रदान गरेका थिए।
कार्यक्रमका प्रमुख अतिथि तथा नगर उपप्रमुख जिरा राईले विद्यार्थीहरूको प्रस्तुति तथा नवप्रवर्तनशील सोचको प्रशंसा गर्दै विज्ञानप्रतिको रुचिलाई प्रोत्साहन गर्ने यस्ता कार्यक्रमहरू निरन्तर आवश्यक रहेको धारणा व्यक्त गर्नुभयो। उहाँले प्रदर्शनीजस्ता कार्यक्रमहरूले विद्यालय र विद्यार्थी दुवैको विज्ञान शिक्षाको स्तर झल्किने र भविष्यमा वैज्ञानिक क्षेत्रमा लाग्न चाहने विद्यार्थीसहित समग्र शिक्षामा सकारात्मक प्रभाव पार्ने विश्वास व्यक्त गर्नुभयो।
सभाध्यक्षका रूपमा मन्तव्य दिनुहुँदै जनता नमुना माविका विद्यालय व्यवस्थापन समितिका अध्यक्ष मनोज तामाङले विकासको मूल आधार विज्ञान भएको उल्लेख गर्दै, आफ्नो विद्यालयलाई नेपालमै पहिलोपटक कक्षा ११र१२ मा निःशुल्क विज्ञान विषय पढाइने शिक्षालयका रूपमा विकास गर्न सफल भएको गौरवपूर्ण तथ्य प्रस्तुत गर्नुभयो।
नगरपालिकाका २० वटा माध्यमिक विद्यालयहरूमध्ये १७ विद्यालयका विद्यार्थीहरूले आफ्ना नविनतम वैज्ञानिक आविष्कार, परियोजना तथा प्रयोगहरू प्रदर्शनीमा प्रस्तुत गरेका थिए।उत्कृष्ट प्रदर्शनी प्रस्तुत गर्दै जनता नमुना मावि गुरुङ्गचौरी पहिलो स्थानमा, बेलका जनता मावि पुरन्दह दोस्रो स्थानमा र वर पिपल मावि कमालावारी तेस्रो स्थानमा विजेता भएका छन्।
कार्यक्रमको संयोजन शिक्षा शाखा प्रमुख हरी कट्टेलले गर्नुभएको हो। कार्यक्रममा प्रमुख प्रशासकीय अधिकृत रविकिरण आचार्य, वडा नं। ९ का अध्यक्ष भरत घिमिरे, विभिन्न विद्यालयका शिक्षक, प्रधानाध्यापक तथा अन्य विशिष्ट व्यक्तिहरूको उपस्थिति रहेको थियो।
