उदयपुरको बेलका नगरपालिका–८ स्थित बोप्ताङडाँडा हालसालै पर्यटनको नयाँ केन्द्रको रूपमा परिचित बन्दै गएको छ। तीन वर्षअघि स्थापना गरिएको फ्लायिंग अन्डर प्याराग्लाइडिङ स्कुल उदयपुर प्राइभेट लिमिटेड मार्फत प्याराग्लाइडिङको आधारभूत प्रशिक्षण दिइन थालेपछि यहाँको आकर्षण उल्लेखनीय रूपमा बढेको छ।
स्कुलले १५ दिने प्याराग्लाइडिङ प्रशिक्षणमार्फत आन्तरिक तथा बाह्य पर्यटकहरूलाई उडानसम्बन्धी सिप प्रदान गर्दै आएको छ। प्रशिक्षक सुरेन गुरुङका अनुसार हालसम्म १५० भन्दा बढी प्रशिक्षार्थीले यहाँबाट तालिम लिइसकेका छन।
प्याराग्लाइडिङ प्रशिक्षक जितेन्द्र रोइला भन्छन्, उदयपुरको प्राकृतिक सौन्दर्य, अनुकूल मौसम र भौगोलिक बनावटले यहाँ प्याराग्लाइडिङको अपार सम्भावना बोकेको छ।यद्यपि टेकअफ र ल्यान्डिङ स्थलमा पूर्वाधारको कमी र सरकारी नीतिको अस्पष्टता प्रमुख चुनौती भएको उनी बताउँछन्।
उदयपुरको बेलका ८ बोप्ताङ्गबाट नेपाल कै ठुलो नदी सप्तकोशीको मनोरम दृश्यावलोकन सँगै सुनसरीको धार्मिक पर्यटकीय स्थल वराहक्षेत्र, चतरा धाम लगायतको मनोरम दृश्य सहित प्याराग्लाइडिङको उडान गर्न पाउने हुँदा उक्त क्षेत्रलाई राज्यले व्यावसायिक प्याराग्लाइडिङ उडानका लागि आवश्यक प्रक्रिया पुरा गर्नु पर्ने देखिन्छ । उदयपुरमा बेलका नगरपालिका ८ बोप्ताङ्ग सँगै चौदण्डीगढी नगरपालिका १ को ऐतिहासिक चौदण्डी दरवार र रौतामाई गाउँपालिका ८ को पर्यटकीय क्षेत्र रौतापोखरी माथिको डाँडा बाट समेत व्यावसायिक प्याराग्लाइडिङको सम्भावना रहेको छ । यी क्षेत्रमा समेत यस अघि उडान परिक्षण सकिएको छ ।
