उदयपुर, असार १२ — त्रियुगा नगरपालिका वडा नं। १२ अन्तर्गत रहेको त्रिवेणी टोल विकास संस्था आज असार १२ गते, बिहीबारको दिन ‘उत्कृष्ट नमुना टोल विकास संस्था’को रूपमा घोषणा गरिएको छ।२५ वटा सूचकाङ्कहरूमा आधारित मूल्याङ्कनबाट ७८ अङ्कको उच्चतम भार प्राप्त गर्दै त्रिवेणी टोल विकास संस्था नमुना टोल बन्न सफल भएको हो।
उक्त घोषणासँगै आयोजित कार्यक्रममा त्रिवेणी टोल विकास संस्थाका अध्यक्ष मन्जु राईको सभापतित्व, त्रियुगा नगरपालिकाका प्रमुख श्री बसन्त कुमार बस्नेतको प्रमुख आतिथ्यता, उपप्रमुख महेश्वरी राई तथा त्रियुगा वडा नं। १२ का वडाध्यक्ष नवीन बान्तवा राईको विशेष आतिथ्यता रहेको थियो। साथै टोल समन्वय समिति अध्यक्ष नवीन राई सहित अन्य विशिष्ट व्यक्तिहरूको उपस्थितिमा कार्यक्रम भव्यताका साथ सम्पन्न भयो।
नगरपालिकाले नमुना टोल घोषणा स्वरूप त्रिवेणी टोल विकास संस्थालाई प्रमाणपत्र प्रदान गर्नुका साथै प्रोत्साहनस्वरूप नगद रू. १५,००० प्रदान गरेको छ। कार्यक्रममा अतिथिहरूले आगामी दिनमा वडा नं. १२ का अन्य टोल विकास संस्थाहरूले पनि त्रिवेणी टोलको उदाहरण पछ्याउँदै उत्कृष्ट नमुना टोल बन्ने विश्वास व्यक्त गर्दै शुभकामना दिएका थिए।
