उदयपुर, असार १२ – चप्पनमा निर्माणाधीन ऐतिहासिक तथा धार्मिक भीमेश्वर मन्दिरमा मंगलबार विशेष पूजापाठसहित गजूर स्थापना गरिएको छ। विधिपूर्वक सम्पन्न पूजाअर्चना पछि गजूर राखिएको हो, जसले मन्दिरको निर्माण कार्यलाई एक महत्वपूर्ण चरणमा पुर्याएको छ।
मन्दिर व्यवस्थापन समिति अध्यक्ष हरि बहादुर श्रेष्ठको नेतृत्वमा अगाडि बढिरहेको यस पवित्र संरचनाको निर्माणमा झीगु नेवा: पुच: गाईघाटले विशेष भूमिका निर्वाह गरिरहेको छ। मन्दिर निर्माणको सुरुवात झीगु नेवा: पुच:का आजीवन सदस्य रामकुमार श्रेष्ठको अथक प्रयास र पहलबाट सम्भव भएको हो।
मन्दिर बनाउने अवधारणाको सुरुवात झीगु नेवा: पुच:का सदस्य दिपेन्द्र श्रेष्ठ, नरेश तुलाधर, विजय तुलाधर,टिका कुमारश्रेष्ठ ,गोपाल श्रेष्ठ र दिनेश श्रेष्ठको योजनाबाट भएको हो। मन्दिरको डिजाइन तयार गर्न दिपेन्द्र श्रेष्ठ र विजय तुलाधरले विशेष भूमिका निभाएका थिए।
यस मन्दिरको निर्माणमा स्थानीय समुदायको श्रमदान मात्र नभई आर्थिक पक्षमा समेत सहयोग प्राप्त भएको छ। केन्द्र सरकार, प्रदेश सरकार र त्रियुगा नगरपालिकाको आर्थिक सहयोगले मन्दिर निर्माण कार्यलाई थप सशक्त र व्यवस्थित बनाएको छ।
मन्दिरले धार्मिक आस्था अभिवृद्धि गर्नुका साथै स्थानीय पर्यटन प्रवर्द्धनमा टेवा पुर्याउने अपेक्षा गरिएको छ। स्थानीय बासिन्दा र भक्तजनहरूबीच मन्दिरको महत्व दिन प्रतिदिन बढ्दो छ।
