उदयपुर, असार १२ – लागूऔषध दुरुपयोग तथा ओसारपसार विरुद्धको अन्तर्राष्ट्रिय सप्ताहव्यापी दिवस उदयपुरमा विविध जनचेतनामूलक कार्यक्रमहरू सहित सम्पन्न गरिएको छ। जुन २० देखि २६ अर्थात् असार ६ गतेदेखि १२ गतेसम्म मनाइने यस विशेष सप्ताहको समापन असार १२ गते प्रभातफेरी र्यालीसहित गाईघाटको पिपलचोकमा गरिएको हो।
जिल्ला प्रशासन कार्यालयको नेतृत्वमा सम्पन्न समापन कार्यक्रममा प्रमुख जिल्ला अधिकारी प्रेम प्रसाद लुइटेल, सुरक्षा निकाय, लागूऔषध विरुद्ध क्रियाशील अभियन्ता, शिक्षक, विद्यार्थी, पत्रकार तथा झीगु नेवा: पुच: गाईघाट लगायत विभिन्न संघसंस्थाहरूको सक्रिय उपस्थिति रहेको थियो।
प्रमुख जिल्ला अधिकारी लुइटेलले सप्ताहव्यापी कार्यक्रममार्फत लागूऔषध विरुद्धको सन्देश प्रवाह गर्दै दुव्र्यसन न्यूनीकरणमा योगदान पुगेको बताएका छन्।
सप्ताहको पहिलो दिन, जिल्ला प्रशासन कार्यालयको सभाहलमा सरोकारवाला निकायहरूसँग अन्तरक्रिया गरी दिवसको शुभारम्भ गरिएको थियो। असार ७ गते त्रियुगा, बेलका र कटारी नगरपालिकाका विद्यालय तथा कलेजहरूमा लागूऔषधविरुद्ध सचेतना कक्षा सञ्चालन गरिएको थियो।
त्यस्तै, असार ८ देखि ११ गतेसम्म त्रियुगा र बेलका नगरपालिकामा रहेका दुई वटा लागूऔषध उपचार तथा पुनर्स्थापना केन्द्रको विवरण संकलन र सार्वजनिकीकरण गरिएको थियो। साथै, असार १० देखि १२ गतेसम्म त्रियुगाको लालपत्ता नाका, बेलकाको चतरा–कोठु नाका, र कटारीको सिन्धुली सिमराही तथा सिरहासँग जोडिएको बेलस्रोत नाकामा निरीक्षण गरी लागूऔषध ओसारपसार नियन्त्रणका उपायहरू अवलम्बन गरिएको थियो।
असार ११ गते लागूऔषध दुर्व्यसनमुक्त समाज निर्माणका लागि “युवा र समाजको भूमिका” विषयमा माविस्तरीय वक्तृत्वकला प्रतियोगिता तथा त्रियुगा जनता बहुमुखी क्याम्पसमा अनुशिक्षण कार्यक्रम सञ्चालन गरिएको थियो।
सप्ताहको समापन अवसरमा आयोजित प्रभातफेरीमा सबै सरोकारवालाहरूको सहभागिता रहेको थियो, जसमा झीगु नेवा: पुच: गाईघाटले पनि सक्रिय साथ दिई लागूऔषधविरुद्धको जनचेतनामूलक अभियानमा महत्त्वपूर्ण योगदान पुर्याएको देखिएको छ।
