उदयपुर जिल्लाको प्रमुख सहर त्रियुगा नगरपालिकाले आफ्नो मौलिक पहिचान झल्काउने लोगो औपचारिक रूपमा सार्वजनिक गरेको छ। नगरको ऐतिहासिक, भौगोलिक, सामाजिक, सांस्कृतिक र प्राकृतिक विविधता समेटिएको सो लोगो १५औं नगर सभामार्फत सार्वजनिक गरिएको हो।
प्रमुख प्रशासकीय अधिकृत कुमारप्रसाद कोईरालाका अनुसार लोगोमा त्रियुगा नगरपालिकाको ऐतिहासिक, भौगोलिक, प्राकृतिक, सामाजिक तथा सांस्कृतिक विविधता समेटिएको छ। यस लोगोमा नेपालको राष्ट्रिय झण्डासहित त्रियुगा र बरुवा नदी, गाईको प्रतिमा, स्थानीय भेषभूषा, धानको बाला, उदयपुर सिमेन्ट उद्योग, गाईघाटको मेन चोकमा राखिएको गाईको मूर्ति, लालीगुराँस, मुडगढा शिला, त्रियुगा नगरको नक्सा, साथै नगरका विविध जातजाति र पेशागत प्रतिनिधित्व गर्ने प्रतीकहरू समावेश गरिएका छन्।
नगरपालिकाले २०८१ साल फागुन २९ गते खुला सूचना जारी गर्दै लोगो डिजाइनका लागि आम नागरिकहरूलाई आह्वान गरेको थियो। चैत मसान्तसम्म प्राप्त १० वटा लोगोहरूमध्ये उत्कृष्ट एक लोगो छनोट गर्न २०८२ बैशाख २६ गते कार्यपालिकाको बैठकबाट सिफारिस समिति गठन गरिएको थियो।
समितिले गहन अध्ययनपछि रामेछाप जिल्लाको खाँडादेवी गाउँपालिका–६ निवासी तथा हाल त्रियुगा–११, गाईघाट बजारमा ‘खाँडादेवी प्रिन्ट सोलुसन’ सञ्चालन गर्दै आएका सुजन कार्की द्वारा तयार पारिएको लोगो उत्कृष्ट ठहर गरेको हो।२०७८ सालदेखि गाईघाटमा प्रिन्ट सेवा सञ्चालन गरिरहेका कार्कीको डिजाइन २०८२ जेठ २४ गतेको कार्यपालिका बैठकबाट स्वीकृत भई अबदेखि औपचारिक रूपमा प्रयोगमा ल्याइएको छ।
स्थानीय सन्दर्भ, मौलिकता र आधुनिक डिजाइनको संयोजनमा तयार पारिएको यस लोगोले त्रियुगा नगरको पहिचानलाई अब थप स्पष्ट र समृद्ध ढंगले प्रस्तुत गर्ने अपेक्षा गरिएको छ। नगरवासीहरूमा समेत यसले एकताको भावनालाई सुदृढ गर्दै नगर गौरव बढाउने विश्वास नगरपालिकाले लिएको छ।
