उदयपुर, असार १० — त्रियुगा नगरपालिकाले आर्थिक वर्ष २०८२ र ८३ का लागि १ अर्ब ५३ करोड ३४ लाख ५९ हजार रुपैयाँको बजेट सार्वजनिक गरेको छ। मङ्गलबार सम्पन्न १५ औँ नगरसभामा उपप्रमुख महेश्वरी राईले बजेट प्रस्तुत गरेकी थिइन्, जुन छलफलपछि पारित गरिएको हो।
उपप्रमुख राईका अनुसार बजेटको मुख्य स्रोत संघीय र प्रदेश सरकारबाट प्राप्त हुने समानीकरण, सशर्त, समपूरक अनुदान तथा राजस्व बाँडफाँडसँगै आन्तरिक स्रोतहरू रहनेछन्। संघीय सरकारबाट १ सय २९ करोडभन्दा बढी र प्रदेश सरकारबाट २२ करोडभन्दा बढी रकम प्राप्त हुने अनुमान छ। नगरपालिकाको आन्तरिक आम्दानी करिब १६ करोड १९ लाख रहनेछ।
यस वर्षदेखि वडागत बजेट सुत्रबद्ध ढंगले विनियोजन गरिएको छ। १६ नं। वडाले न्यूनतम ५३ लाख र ११ नं। वडाले अधिकतम ८२ लाख प्राप्त गर्नेछ। कुल १० करोड ५० लाख बजेट वडागत रूपमा छुट्याइएको छ।बजेटमा चालु खर्चतर्फ ६४ करोड ४० लाख र पुँजीगत खर्चतर्फ ८८ करोड ९४ लाख विनियोजन गरिएको छ।
नगरप्रमुख बसन्त बस्नेतका अनुसार “जनतासँग मेयर”, “जनतासँग उप-मेयर” र “अभरमा नगर” कार्यक्रमलाई आगामी वर्षमा पनि निरन्तरता दिइनेछ।
साथै, संघीय तथा प्रदेश सरकारको सहकार्यमा सञ्चालन भइरहेका बहुवर्षीय योजना, साझेदारी संस्थासँगको सहकार्यमा गरिने कार्यक्रम, सडक, नाला, खानेपानी, विद्यालय तथा स्वास्थ्य भवन निर्माण लगायतका विकास योजना बजेटमा समावेश छन्।
नगरप्रमुख बस्नेतले जनताको आवश्यकतामा आधारित योजना अघि बढाइने र बजेट कार्यान्वयनमा पारदर्शिता र प्रभावकारिता कायम गरिने प्रतिबद्धता जनाएका छन्।
