उदयपुरको सदरमुकाम गाइघाटमा नेवार समुदायको परम्परागत संस्कृति संरक्षण्को लागि धिमे एवम् बाँसुरी बाजाको आजबाट प्रशिक्षण सुरु भएको छ । उक्त तालिमको उद्घाटन मेयर बसन्त कुमार बस्नेत र वडा अध्यक्ष सुमन्त कोइरालाले गरेका हुन् । त्रियुगा नगरपालिकाका मेयर बसन्त कुमार बस्नेतले मौलीक कला, संस्कृति र भाषाको संरक्षणले मात्रै परम्परागत मान्यताहरुलाई जोगाउन सकिने बताउनुभयो । उहाँले नगरक्षेत्रभित्र रहेका कला संस्कृति र सम्पदाहरुको संरक्षण र सम्बद्र्धनको लागि नगरपालिकाले आगामी बर्षको निती तथा कार्यक्रममा बिशेष सम्बोधन गर्नेे बताउनुभयो ।युवा पुस्ताले बाजा संरक्षणमा चासो नदेखाए संस्कृति नै लोप हुनसक्ने बस्नेत ले बताउनु भयो ।
धिमे र नेवारी संस्कृतिको बाँसुरी बाजा बजाउने शिपको क्षमता विकासको लागि सनिबार देखि सुरु भएको तालिम एक महिनासम्म सञ्चालन हुनेछ । धिमे बाजा नेवार समुदायमा सबै शुभकार्यमा बजाइने बाजा हो । तर, यही बाजाको संरक्षण नभएर लोपोन्मुख अवस्थामा पुगेपछि झिगु नेवा पुच उदयपुर गाईघाटले बाजाको संरक्षण गर्ने अभियान थालेको हो ।
झिगु नेवा पुच उदयपुर गाईघाटका सह-सचिब दिपन्द्र श्रेष्ठले धिमे बाजाको तालिम ८ बर्ष पहिले पनि संचालन गरिएपनि बाँसुरी बाजाको तालिम भने पहिलो पटक आयोजना गरिएको बताउँदै सहभागीहरुलाई तालिमलाई फलदायी बनाउन आग्रह गर्नुभयो । सुधन मुनिकारले उक्त तालिम दिनेछ ।
