उदयपुर,भाद्र १९ – त्रियुगा नगरपालिकाले खोलामा निर्माण गरिएको बाँध क्षेत्रमा सरसफाइ र सौन्दर्यीकरणलाई लक्षित गर्दै नयाँ कदम चालेको छ। लामो समयदेखि पानीको बहावका कारण गहिरो खाल्डो बनेको स्थानलाई व्यवस्थित गर्न फोहोर व्यवस्थापनसहित हरियाली प्रवद्र्धनको योजना अघि बढाइएको हो।
यस अन्तर्गत उक्त खाल्डोमा फोहोर संकलन गरी माटोले ढाक्ने कार्य थालिएको छ। यसपछि आकर्षक बनाउन फूलका विभिन्न प्रजातिका विरुवा रोपेर बाँध क्षेत्रलाई हरियालीले भरिपूर्ण बनाउन लागिएको छ।
कार्वाहक मेयर सुमन्त कोइरालाले यस अभियानबारे जानकारी दिँदै भने, नगरपालिकाले दीर्घकालीन सोचका साथ बाँध क्षेत्रमा हरियाली विस्तार गर्दै वातावरण संरक्षण र सौन्दर्यीकरणलाई एकसाथ अघि बढाउने लक्ष्य लिएको छ। जनमानसमा सरसफाइ र वृक्षारोपणप्रतिको सकारात्मक चेतना पनि फैलाउनेछ।
वडा नम्बर ११ का ४० वटै टोल विकास संस्थाका अध्यक्षहरुको भेलाको निर्णयानुसार फोहरको बाँध निर्माण गर्न लागिएको जानकारी दिए । स्थानीयवासीहरूले पनि नगरपालिकाको यो प्रयासलाई सराहना गरेका छन्। यससँगै त्रियुगाको बाँध क्षेत्र दिगो वातावरणीय संरक्षण र नगर सौन्दर्यीकरणको उत्कृष्ट नमुना बन्ने अपेक्षा गरिएको छ।
